28/08/2008
文： Jeff
依家去機舖打鋪《三國志大戰》要成$15，連《Gundam VS Gundam》都話$5起跳，仲要幾分鐘打完鬥快燒錢，真懷念二十年前一蚊打爆《戰斧》、《獸王記》的日子。很多玩家都同小記一樣有鋪舊Game癮，所以ATGAMES索性集齊二十款SEGA經典大作，以$249平價推出二十合一手提遊戲機，計落$12.5就有一隻遊戲，更可以駁電視當街機打，心血來潮拎出來玩幾鋪，此刻無價。
記得細個去旅行時，總有同學仔拎部遊戲機出來打，而ATGAMES正是改良Game Gear遊戲機概念，手掌咁細的機身內置2.4吋LCD彩芒，配合機面的十字按鈕和A、B、C三粒操控掣，用來玩舊式遊戲剛好夠用。
最開心是它解決了舊式手提遊戲機食電的問題，只需三粒AAA電池就可帶出街玩成日，而且去到朋友屋企又可以AV輸出直駁電視，變身經典家庭遊戲機，足以令人回味。
廿款Mega Drive大作
雖然SEGA唔再出遊戲機，但當年Mega Drive一系列遊戲絕對稱得上經典，今次在ATGAMES手提遊戲機主要收錄了二十款八十年代的大作，包括《戰斧》、《忍》、《獸王記》、《超音鼠》、《Ecco》、《鑽石方塊》、《異形風暴》、《ESWAT》、《影舞者》、《Ristar》等等，不少遊戲在Wii和Xbox 360等網上中心都需用Game Point下載，單是《戰斧》在Xbox Live Arcade便要400點（約$40），依家在ATGAMES可一次過集齊廿款，乜都抵番晒！
重拾經典回憶
實際試玩方面，ATGAMES與其他多合一遊戲機一樣，開機會彈出主目錄畀用家揀遊戲，再按Start便可開始玩。
以較出名的《戰斧》和《獸王記》為例，整體感覺和速度與Mega Drive一模一樣，不過沒有雙打選項，有點美中不足。其次，由於LCD解像度得480×240，都預冲無NDS和PSP咁靚，出街在陽光底下畫面甚至會偏暗，但二百幾元貨色算係咁上下啦！
《戰斧》
見到小矮人記得踢佢收集魔法瓶，見到大佬就可使出強大魔法。
《獸王記》
食三粒珠變獸王，連絕技和屈大佬的方法都同街機一模一樣。
《超音鼠》
可謂SEGA成名作，一邊跑一邊食圈圈，到現時仍有不少粉絲支持。
《鑽石方塊》
當年Game Boy玩《俄羅斯方塊》，Game Gear就玩《鑽石方塊》，鬥得難分難解。
《忍》
初代的忍者遊戲，邊闖迷宮邊放飛鏢，仲有絕招可以用。
查詢：2366 1001
)
)
)
)
)